今日媽媽終於都還我一個清白, 記得近排佢都提過我幾次賴尿, 仲以為係我因為番風落雨...
噚晚佢唔小心整跌咗張輪椅, 見我都好驚望住. 不過佢都無過黎藹藹我, 佢話唔可以下下都呵我, 唔係就等我以為驚就有人錫錫, 係岩的行為. 不過過咗幾個鐘, 佢發現地下有一篤仔濕咗, 咦, 但又唔見我踎過享度痾喎. 其實佢都唔肯定果d係水定係尿, 因為我成日都會嘔水. 唔通頭先嚇到賴尿? 無理由突然細膽成咁下化! 但跌完輪椅我都係眼望望, 同地下灘水係兩個地方黎喎.
過咗一陣, 佢叫我上梳化玩, 不過我都無咩心機, 咦, 轉頭梳化又濕咗既? 用1比49清理好之後, 佢開始懷疑係我. 晏d我再上梳化, 落地之後又一濕咗一撻仔....屋企地下無端端又多兩個晎....
心之不妙, 一摸先發覺 - 我成個肚都濕晒! 呢次佢肯定我唔係賴尿啦! 因為賴尿的話我會踎享度痾, 痾完都會走開, 唔會整到成身濕晒.
十點幾老豆番黎, 第一時間係同我沖涼啦, 跟住用消毒葯水抺晒成屋地. 媽媽開始聯想起近呢幾個月我都有一兩次起身賴濕咗張床, 有時地下又有小小水蹟.
直到今日下午, 媽媽有朋友上黎探佢. 開頭我都幾興奮, 但好快都平靜番, 仲一齊睇碟, 我都無搞佢地, 只係享地下瞓覺. 但轉頭地下又濕咗喇....媽媽叫爸爸摸下我, 真係濕咗小小肚仔! 媽媽的朋友話點解佢唔鬧我呢? 唔可以咁縱容我播. 仲話如果係佢地隻狗, 痾歪d都要鬧呀. 不過今次媽媽好認真對佢地講, 我唔係賴尿, 因為成個下午, 佢都坐享我格離, 我都無起過身, 點算賴? 而且中間都無野刺激過我. 我平時痾尿去尿盤一滴都唔出界架! Vera姨姨都讚我乖! 嗚嗚嗚....媽媽噚晚成晚仲叫我做賴尿妹!
媽媽話呢次真係唔等得啦, 仲想等多兩個月, 到打週年針時先去剝我隻大牙. 宜家book咗Dr 千, 不過要排到下個禮拜尾先有得睇! 突然變咗咁多人睇?
晚上佢地食完飯番黎, 媽媽打咗比姨媽, 因為記憶中大山婆都好多時痾尿唔清, 會漏尿, 不過大山婆係痾完先漏, 我就係痾之前漏, 姨媽好快摷書就搵倒料啦, 媽媽轉頭都上網幫我搵咗d資料, 原來都幾普遍下, 一般都唔係咩大病, 成犬有時八九歲會出現, 但絕咗育的母犬因為荷爾蒙減少, 有時在三至五歲都會出現. 多數會係享狗狗relax話瞓覺時發生. 其實佢都記得當年老虎醫生都同佢提過狗女絕咗育都有機會第日控制膀胱肌肉無咁好, 會有漏尿情況出現, 不過媽媽成日以為所指的漏尿只係幾滴, 而唔係半篤咁多.
咁好啦, 宜家唔可以再叫我做臭尿妹啦, 我係病人黎架!
下星期尾睇醫生, 希望係如佢想像中的因絕育令荷爾蒙減少唔係咩大件事啦. 不過如果係的話, 都有排食藥.
Spicy媽後記 2008
之前有朋友問我, Spicy會否有機會是因為牙痛才賴尿? 我想兩者應該沒有關連吧! 當時也沒有問過醫生, 因為在她牙肉腫要脫牙的的半年前都有賴尿的情況出現, 但想不到奇跡真的出現了, 在這大半年來, 漏尿的情況都再沒發生過....
希望她真的可以健健康康活到老.
F
回覆刪除