2007年6月3日 - 再戰貝沙灣

點解今日又再去呢? 原來係因為噚晚Summer媽咪打黎話本身上今日去, 不過我地噚日又去咗. 唔....咁我地又捨命陪君子, 今日又再去過啦. 不過要唔該晒Summer黎接我地喇, 今日仲加埋NonoGigi添!

上幾次見佢地影相都好唔合作, 不過今日又好好喎. 可能係見劉生買咗新相機, 真係要比下面喎! 以前佢用傻瓜機, 都費鬼事嘥我地時間!

呢排No仔真係精神咗好多, 毛都多番晒, 希望佢快d好似老兵咁, 標番個尾會, 十一歲先黎發育啦!

我同Bingo都要媽子又"藝"又西先可以坐定定. 係難為咗老豆姐! 將我地搬黎搬去, 搞到一頭大汗!

老兵係咪好得?  佢d毛已經掂倒地喇.  前兩日老豆仲發現, 原來近排佢連腳後踭都標毛出黎, 養咗佢八年都未見過佢咁, 呢d可能就係佢d腎病藥既side effect!

Bobo影相呢, 就永遠都最乖. 呢樣我認我真係唔及佢! 皆因佢孝順媽媽, 唔洗佢勞氣嘛!

近年黎老媽子愛上咗影我個pat pat, 貪佢夠圓潤呀!

老兵唔洗講 - 又係成日都霸住老媽張輪椅啦!  佢可以趁老媽子一落地幫佢影相, 就黎一個移形換影, 立即1秒9就衝上去! 佢衝得好快架!  你地擋都擋佢唔住! 

Summer因為閃得太快, 所以我個跛媽媽坐下跳下都影唔倒佢d坐定定靚相!

每次的例牌動作係大合照!

晚上我地去咗九龍塘食飯, 居然食食下見倒Brownie, 一一同緣緣喎.  真係開心嘞!