2007年6月17日 - 父親節快樂

今日係父親節, 爸爸今日早上要返工, 下午先返黎同媽媽去食飯, 不過唔知今日會唔會帶我地去慶祝呢?  不果如果無得去都無所謂啦, 出面又熱, 又隨時落雨. 況且我地噚晚去Bobo度玩到好夜先走, 宜家都未攰完. 

講開我爸爸, 熟朋友都知佢好叻, 唔係話事業有成, 專業人士果d叻, 而係佢真係照顧得我地好好, 平時幫我地清潔, 滴frontline, 刷牙, 洗耳, 咩都係佢. 又識煮飯, 煮比媽媽食不突止, 呢排媽媽跛咗, 佢連homemade food都識整比我地食添, 所以媽媽在家呢段日子, 我地居然日日有飯食, 人地會以為係媽媽整, 查實都係老豆的功勞.

我地都知老豆辛苦架喇, 又要出去賺錢養我地, 放假又要陪我地呢度去, 果度去, 呢個幾月仲要將返工時間縮短, 因為佢要照顧埋媽媽的早、午兩餐先走得, 放工又要拿拿臨返黎陪我地, 有時又車媽媽出去食下飯, 驚佢一個人享屋企太悶, 淨係見佢攞張輪椅的上的樓架車, 都幾辛苦架.

媽媽成日話老豆緃我地, 好似佢叫老豆唔好比咁多零食我地, 老豆啋佢都傻, 基本上除咗狗零食之外, 老豆食咩都靜靜雞比d我地食, 比媽媽捉倒又捱鬧. 我地連薯片, 牛肉乾都試過!  老豆成日話食一點試下之嘛!  而老豆日日收工返黎, 都同我地玩人浪, 又叫又跳咁. 媽媽就最反對呢樣野, 話佢整到我地呱呱嘈, 不過我地好鍾意咁玩, 只有老豆先會咁陪我地一齊癲, 如果係媽媽享外面返黎, 我地兩個好乖架, 只會吠幾聲, 衝去門口, 唔見老豆就即刻收口架喇.

以前媽媽成日話老豆感情太豐富, 死條魚都會喊.  d動物片呀, 網上d什麼狗狗遭不幸對待片呀, 佢全部都唔睇架, 因為佢話睇咗會唔開心喎.  死啦, 第日如果我地走咗, 老豆可能比媽媽仲偒心呀! 不過老豆老媽子, 你地唔好諗咁遠喇, 我同Bingo有生之年都好好好孝順你地既! 

我知道偉大的不止我爸, 其實身邊所有狗狗朋友的爸爸都係咁勞苦功高, 所以我要享今日祝所有我識的狗爸爸都父親節快樂!

爹爹I Love You!