2007年7月23日 - 碗屋日本菜

去完書展, 兩個人都攰到散晒.  Oldman突然話想食d好野, 想去中環食日本菜, 皆因除咗車我返工放工, 我地享香港食飯, 佢成日都話香港泊車貴又唔方便, 所以今次無渣車, 不如就打的去呢度啦.

其實享中區返工日子久的人, 好多都識呢間餐廳, 因為由我史前第一份工時佢已經存在, 真係一間老字號.  不過我就只幫襯過佢的set lunch, 睇住佢由從前的三幾十蚊, 到現在的百幾二百蚊.  近幾年可能生意不景, 晚市佢地轉咗做all you can eat.  價錢拍得住大酒店, 但就無酒店buffet咁多選擇, 因佢只做日本菜.

腳傷以後有次都想出去食buffet, 不過我渣拐仗, 當然無可能出去取食物啦.  呢種唔洗自己行的放題就岩我嘞.

餐廳星期一至四有三個主題餐牌可以揀, 分別係火鍋, 爐端燒及鐡板燒, 星期五六就無火鍋 (星期日休息的!). 而刺身手巻壽司就三款都包. 每人可以揀一款主題, 如果三位以上就可以全選.  我地只得兩人, 因前日才食過shabushabu, 所以決定捨棄火鍋, 但見隔離枱揀火鍋除咗叫牛肉外, 仲有海鮮.   (Summer媽咪, 食時突然掛住你添, 因為之前你提過有興趣, 四個人又可以食齊三款, 可惜Oldman今次玩即興!)

雖然無火鍋食, 但兩款燒加埋剌身及壽司, 都已經有70幾種食物, 兩個人都無可能試暈晒, 而食物的質素, 就真係比酒店的buffet好, 尤其是係剌身, 赤貝同甜蝦係我的必食推介, 比出面的日本餐廳新鮮得多.  佢地的甜蝦比一般的大, 比牡丹蝦細少少.  食物每次落單先即做, 熱辣辣, 分量剛剛好, 唔會浪費, 而且酒店buffet大家比的價錢大部份係要計埋浪費食物的成本上, 如果去酒店食buffet單係為咗食魚生, 就不如去呢種日本餐廳食嘞.

可惜我無帶相機, 只係靠Oldman的手機影咗兩張相 (我部手機既鏡頭已經比Spicy貼紙遮咗!).  因為太攰, 所以只係草草影咗兩張就算.

埋單兩個人600幾 (每位$298加一), 唔可以叫抵食, 但可以話值得囉, 因為你用600幾蚊去其他日本菜館的話, 就一定食唔倒同一質素兼同等份量既野, 一般餐廳單係一個好少少的剌身拼盆都要300幾, 計數都有著數既.