2007年4月6日 - 送別Matrix!

前日下午接倒Amy電話, 邀請我地去佢屋企燒野食, 晚上開開心心出去買材料整野比狗狗開party, 享超市仲同Matrix爸通電話, 都知Matrix情況唔太好, 不過橫掂聽日下午都會帶佢去覆診, 都打算帶佢一起黎.  我仲同Matrix爸講會整佢愛吃的酒釀丸子比佢食.

誰不知三個小時後就收倒呢壞消息.  本來仲諗住準備定d材料聽日用, 唉! 咩心情都無晒!  聽日先算! 成晚都眼光光, 老公唔可以接受現實, 半夜突然問我:  老鬼會唔會其實仲未死?  我答佢:  你話呢?  老公問: 我地洗唔洗去喪禮?  我問佢: 你想去嗎?  佢答: 我都唔知...不過我想我地應該去!

到早上, 我一早起身預備晚上bbq的食品, 雖然心情沈重, 不過路還是要繼續走的. 跟住接倒Amy電話, 話佢下午會去Matrix的喪禮, Amy話佢問過Matrix媽, 無問題.  哦, 我都可以去嗎?  我知還有好多Matrix的好朋友都想送佢最後一程...

好快就收到Matrix媽電話, 哭著問我可唔可以幫一個忙, 我答你儘管說.  原來Matrix同communicator說佢想著一套禮服走, 因為自己係一個伸士.  收線後我打咗好多個電話, 因為市面上現成的禮服都只係比小型狗的, 所以比較有難道.  我一邊打電話, 一邊要準備狗狗pie, 結果個pie好燶, 我估其他狗狗唔會怪的的.  不過同時亦換黎好消息.  因為正當我走投無路, 正準備叫老公開車出去旺角買童裝禮服時, 突然想起跑馬地的寵物店可能會有, 因為以精品居多, 我立即打比住享跑馬地的Sandie.  太好喇, 真係有岩Matrix著的size!  好多謝Ellen, Vera, Sandie幫手, Ellen仲要打比未起身的Debbie吵醒佢. 仲有我呢個好體貼既老公, 肯義不容辭咁應承立刻開車載我出去搵禮服.  呢件係我地為老鬼做的最後一件事, 希望佢會鍾意套衫.

跟住我約好所有人, 一起出發去火葬場.  老公因為要睇住兩隻狗同大家泊享樓下的車, 所以結果無上去.  同行除咗Matrix父母, 仲有Sandie, Vera, Amy, 佐治, Attila同細妹大雄.

上到去趁等候時間, 我參觀咗善終公司的寵物靈位房, 好大, 好光, 可能係因為清明時節, 所以每個靈位都好豐富, 好多食物同小玩具.  發覺原來放享度的大部份狗狗都超過10歲才走, 有d小牧有14、5歲, 隨即諗起Bingo都快11歲了.

跟住我地被帶去見Matrix最後一面.  鐡床入面既Matrix好安詳, 好似瞓咗覺咁, Matrix媽同工作人員合力幫Matrix穿起禮服, 出奇地合身.  起初工作人員話套禮服唔可以一起燒, 因為有膠成份, 後來拆開發覺無問題, 我心都鬆一口氣.

著起禮服既Matrix又回復當日英勇, 高傲既樣子.  我忍唔住上前摸咗佢幾次, 拍拍佢, 同佢講再見, 叫佢以後要乖乖地, 開開心心.  好多謝Matrix爸比我幫佢拍咗幾張相, Matrix爸仲叫我幫佢拍video.  老公番屋企睇完話Matrix好似瞓咗覺咁, 好舒服.

我帶咗一包彩色的餅餅比Matrix陪佢上路, Vera姨姨焗咗鬆餅, Matrix媽帶咗狗糧同Matrix病危時想吃的牛角飽, 一時間好多好多食物圍住佢, 感覺Matrix好幸福呢!

最後Matrix媽按制, Matrix就被推入火爐, 永別了!

Matrix已經去咗一個無疾病無痛苦既地方.  我地好多謝佢之前帶比我地好多歡樂, 我永遠都唔會忘記佢嗡牙個樣, 同埋獨一無二, 好似狼叫既吠聲!