2003年1月25日 我要絕育了

因為我早起水既關係 (七個月就黎喇!), 阻遲咗媽媽同我訂定的家庭計劃.  當年仲有好多人勸佢唔好同我絕育, 話我呢d顏色少有, 唔生bb好嘥, 不過媽媽梗係唔捨得比我生啦! 爸爸就話要生的話就要所有bb都要晒, 唔準比人架, 嗄, 呀媽話千祈咪搞呀!

於是佢地就約咗太平道麥子健診所的Dr Tint幫我絕育, 順便幫我電埋眼泣毛! 仲有拔埋兩隻唔肯甩的牙仔.  醫生話因為我有條眼泣毛倒生, 所以成日流眼水喎.  拔咗條毛毛之後仲要電死個毛孔, 咁條毛毛就唔會再生番出黎篤我隻眼架喇.

前一晚呀媽仲驚我帶唔慣燈罩, 叫我要實習下喎.　hehe, 我靚唔靚呀. Bingo唔好瞓, 睇下啦!

 

呀媽話我唔可以咁得戚, 叫我同pooh pooh 拜拜喎. 因有排都唔可以攬住佢瞓.

第二朝一早佢地就帶咗我去診所喇, 仲等咗好耐先見倒Dr Tint, 因為佢地太緊張, 好多野要問! 車, 又唔係第一次, Bingo都試過啦, 都唔知做咩咁大驚少怪!

點知原來我係排到當日最後一個先做手術, 佢地六點幾黎接我時我都未醒, 佢地要享出面等多半多鐘, 姑娘拍醒我先比走呀!  不過我上車又瞓番.

醒番之後好痛呀!  唔怪得呀媽噚晚叫我帶燈罩唔好笑啦, 宜家明點解笑唔出嘞!