呢排媽媽整親腳朝早出唔倒去做瑜珈, 又唔行得山, 以為對我地都無咩好處啦, 誰不知佢今朝起身比個意外驚喜我地呀!
睇下, 就係脫脂奶蛋白麥皮嘞!
咦, 咁大煲, 唔係比晒我地食架....淨番果d媽媽自己食呀? 咁不出黎一齊食啦, 快d, 我地等埋你.
嗄, 未得? 點解呀?
啊......點解媽媽你地食果d要加料架? 又話一齊食健康中餐既....
你加咗果支甜牙膏, 咁迷好高糖份, 一d都唔健康囉! 哎吔, 我地唔理你喇咁! Bingo咁快清底, 我唔再食快d, 實比佢搶埋!
2007年3月31日 星期六
2007.04.01 假日早餐之脫脂奶蛋白麥皮
2007年3月31日 探完Matrix
爸爸媽媽今晚同埋其他uncles aunties去咗探Matrix, 死人bobo都有得去! 
但我知今日的Matrix狀態唔多好. 初初大家去到時佢仲瞓享廳, 但佢好努力咁要起身歡迎客人. 佢兩個細佬又享廳走黎走去, 所以佢媽媽都係放番佢入圍欄. 不過佢唔開心呀, 所以無耐大家都係決定放番佢出黎, 由於佢四隻腳企唔倒, 所以大家都抱住佢又扶下佢. 
上次有animal communicator話Matrix同佢講鍾意食牛角飽, 所以我姨媽同double媽都買咗牛角飽比佢食, 佢雖然唔係幾睇倒, 但都好開心食喎. 雖然佢盲中中耐唔屎會咬住大家的手指.
無耐到咗食飯時候, 佢仲好有餵口添, 梗係啦, 三個人陪佢一齊食, 佢爸爸負責渣住兜糧, double媽同auntie amy抱住佢個身身.
食飽飯的Matrix就肯乖乖瞓喇, 大家睇電視又食野鬼咁大聲佢都唔醒. 仲瞓咗成兩粒鐘.
不過唔知點解, 到夜d大家都想走時佢又醒咗lu. hehe, 原來佢知佢媽媽特登焗咗個蛋糕氹佢開心呀! 睇下幾靚!
Matrix你就好啦, 食得幾招積!
Matrix, 雖然我知你好唔舒服, 不過媽媽都好多謝你今晚咁努力起身招呼佢地, 希望今次熱鬧的氣氛可以為你帶多d生氣. 但下次黎探你時你唔好咁梗頸係都要起身喇!
你之前同animal communicator講叫大家唔好強求, 唔想爸爸媽媽傷心, 但如果你就咁就走咗, 你覺得佢地唔會傷心咩? 計我話, 你一於唔好諗咁多, 留番d氣力養好身子, 咁先至係你爸媽的乖仔. 我地一家四口都會祝福你, 你仲要出黎比我啄架! 享Bingo, Nono同你三個老鬼中, 不嬲你都係最梗淨的一個, 你唔會咁快認輸架係咪?
2007年3月30日 星期五
Bingo醒過我...
媽媽成日都話Bingo聰明過我, 車, 人老精, 狗老靈, 佢大過我成倍呀! 聰明過我有咩咁奇jack!
點知今朝又比老豆發現Bingo又醒過我!
原來個衰公識開閘架!
不過又唔係次次都一開就得掂, 有時都要抓多幾抓先得.
車, 不如讚我識掹衫尾跟住佢入仲好啦! 因為我一行得慢D就....
你地好野! 賴低我一個享出面!
2007年3月29日 星期四
2007年3月29日 今餐食乜餸之Cottage Cheese+蛋蛋
好耐無食Cottage Cheese喇, 皆因呢度附近間百佳突然無得賣, 惠康又從來都無, 爸爸話可能見無人食喎. 咩呀, 好好味架, 媽媽不知幾鍾意食. 今日媽媽終於去金鍾既GREAT買咗喇!
今餐媽媽做少好多功夫lu. 又唔洗烚肉同打肉, 淨係烚蛋蛋同打菜菜就得嘞!
除咗Cottage Cheese同蛋蛋, 仲有西芹蓉同埋媽媽自己種的Alfafa. 媽媽仲驚我唔飽, 加咗少少飯比我添!
Bingo都有得食架, 但因為佢有腎病, 要食低蛋白餐, 所以只有菜菜, Alfafa同埋少少Cottage Cheese, 再加d處方餵, 蛋蛋就無佢份lu.
Bingo失聲了
識我地既朋友都知, Bingo就最鍾意吠架嘞! 有人入屋又吠, 有人出門口又吠, 有得食又吠, 有街去又吠, 享街回程走又吠, 連佢陪我去返學, 都上堂吠到落堂, 總之咩都係吠咗先啦!
但今日佢居然無聲出喎! 其實今朝起身, 媽媽都已經覺覺得佢有d唔妥, 但又講唔出佢有咩問題, 總之好似囉囉孿咁, 話佢無精神又唔係, 總之你想摸佢, 佢就向後退, 但佢又唔係咪埋.
咁下午爸爸咪早d收工番黎囉, 佢話好擔心Bingo喎, 可能呢幾日比老鬼嚇親. 但出奇地一開門, Bingo只係吠咗一聲咋. 平時爸爸返黎, 佢會由爸爸開門吠到佢入咗屋, 開咗閘都仲要吠多好多下架嘛. 都唔知佢做乜, 跟住媽媽番黎又唔吠, 不過我地不嬲都唔敢吠媽媽架, 爸爸於是用咗好多方法引Bingo, 但佢都吠唔出聲呀, 只係作下狀, 想吠, 但又吠唔出.
唔知佢係咪喉嚨痛呢? 佢又唔似有病喎, 又無攰拉拉, 又食得. 頭先爸爸同佢探熱, 佢都無發燒. 死啦, 如果睇醫生, 點講呀, 唔通話佢失聲?
2007年3月28日 星期三
2007年3月28日 矇面俠
頭先爸爸媽都享房上緊網, 突然媽媽聽倒d怪聲, 問爸爸咩聲, 爸爸話應該係岩岩丟咗個狗糧袋, 無野既. 媽媽唔放心, 都係要出廳睇下.
點知出到黎, 就見倒一隻盲頭烏蠅享個廳到鍾黎鍾去, 敝! 今次斷正添!
好衰既媽媽仲立即叫爸爸黎睇, 又一手攞個相機影我! hehe, 不過佢咁急, 都開唔切閃光燈, 所以張相矇查查, 抵死!
2007年3月27日 星期二
2007年3月20日 老鬼第二晚留醫
媽媽岩岩同auntie micky & uncle joseph探完matrix番黎喇. 同行仲有呀劉生, 碧碧姐姐, 同auntie amy.
今日auntie micky同媽媽通咗幾次電話, 都話老鬼情況不妙, 呢兩日已經唔認得佢地, 又失禁, 仲企唔穏, 癲癇發作的次數越黎越頻密, 醫生話應該係佢個腦個瘤不段澎漲, 所以影响倒佢既腦神經. 但呢一切都只係憑醫生經驗推測, 因為matrix年紀太大, 醫生唔建議佢照磁力共振, 單係麻醉佢都未必頂倒. 醫生仲叫佢地最好快d決定好唔好送佢一程. 講到呢度, auntie micky都講唔倒野嘞.
因為醫院要九點半後先可以探病, 爸媽唯有番黎餵咗我地先再出去. 診所比預期中多人, 質到滿晒, 鬼咩, 人人都被迫迫埋同一個時間去. 但去到見倒的matrix明顯己經有好轉, 應該係今朝醫生同佢打咗支類固醇針的影嚮. 起初眼仔都係dup晒, 不過好開心佢認得人呀, 佢爸媽抱佢出黎時佢都會挨住佢地, 雖然四隻腳都係完全無力, 企唔穏, 但佢地開咗罐濕糧比佢, 佢都肯食, 下午都唔肯食野. 媽媽地叫佢佢都有反應, 當然唔好望佢好精靈週圍行啦. 食咗少少野, 再餵佢飲少少水, 佢又好番d喇, 對眼仔又有番神, 不過全程佢都唔可以自己企, 要大家扶住佢.
個個都扶下佢, 呵下佢一輪之後, 雖然唔捨得, 不過都要走喇. 睇倒佢宜家呢個情況, 大家個心都定dd, 不過獸醫話其實類固醇只係可以頂住下, 而且副作用極大. 唉, 宜家唯有望奇蹟出現啦. bingo舊年都食咗半年類固醇, 宜家都好番, 當然要長期每日食藥啦. 希望老鬼都可以好似bingo咁大步欖過!
頭先爸爸同佢用手機影咗幾張相, 先前佢話要帶相機去, 仲比媽媽鬧, 話大吉利是, 不過宜家諗諗下, 影d相可以等佢第日好番時笑佢!
2007年3月26日 星期一
2007年3月26日 老鬼, 你要撐住呀!
呢個係Matrix, 花名叫老鬼, 係我既好朋友之一, 佢已經十二歲, 近來身體唔多好呀, 成日都抽筋, 仲失禁. 睇咗醫生都無咩好轉, 今日又轉睇專科. 頭先佢媽媽打黎, 話Matrix今晚要留醫呀. 聽朝先有機會見專科醫生. 有機會係腦瘤. 大家都好擔心呀. 希望佢今次大步欖過啦.
老鬼, 你要頂住呀. 你雖然平時好惡, 成日翁牙又噬人, 個個都怕咗你咁, 但次次我媽媽餵你食野時我翁番你又啄你, 你都會讓我, 避咗我. 你要快d好番, 至多我以後唔同你掙野食, 有好野讓晒比你呀!
2007年3月25日 星期日
2007年3月25日 我地返咗屋企喇!
今晚媽媽終於湊咗我地返屋企喇, 又話住一晚, 終於要兩晚先黎! 仲要Vera姨姨帶埋我地去深井!
皆因好好人的Vera姨姨今日帶咗我地去河貝水塘玩, 仲有bu-b, double同single, 又帶我地去有機農莊參觀, 仲買埋菜菜送比媽媽添呀! 媽媽對對唔行得山, 咪無得去囉! 晚黑佢地帶晒我地去深井食飯, 爸爸媽媽先至施施然咁落黎一齊吃. 真係又食又拎! 我好有骨氣架, 我見面都無啋媽媽, 係果個bingo先鬼咁掙氣, 一見倒佢地就撲撲撲!
Vera姨姨好好人, 仲幫我地記錄咗d生活片段享bobo個blog添!
2007年3月22日 星期四
2007年3月22日 我地聽日要去Vera姨姨度住喇
今日好悶好悶好悶, 呀媽日日享屋企, 又唔同我地出街, 連行多步都唔得! 悶死人喇! 不過媽媽話今晚舅父由美國番黎, 佢地要一齊上大陸喇. 媽媽臨出門口時影低咗我地個悶樣:
影咁多做乜鬼姐! 都費事啋你!
媽媽: 好, 你地唔啋我, 我影窗口! 黃昏出面矇查查!
晚黑呀媽接左舅父返黎之後我唔知點解好驚佢呀! Bingo就一d都唔驚, 仲成日黐住佢添! 正一擦鞋仔! 呀媽同老豆除咗幫自己執野之外, 就係要幫我地執, 又糧啦, 又bingo d藥啦, 仲話要帶玩具, vera姨姨又再提佢地記得帶藥, 車, 去一晚咋下化, 你地一個二個咁緊張....
2006年12月10日 我agility初班畢業了
hehe, 因為今次上完堂無幾耐, 所以我記得學咗d咩野架, 不過耐d就唔敢包喇, 因為我地都無得練習, 上堂學咗果d野街度無得玩架, 媽媽又未搵倒一個岩心水的俱樂部可以入會帶我地去玩, 所以都唔知學黎做乜! 不如帶我去學花步舞仲好啦! 嘥鬼氣!
呢個就係我地個滅時Rose喇, 我由bb班開始都係佢教架喇. 不過幾次都係中途就換咗個Rosalind.
我d同學仔呀, 左至右, Joel, 我, Summer同Bobo.
我地d媽媽同滅時一齊影番張相先.
不如睇下我玩誇欄啦:
唔好睇少個欄呀, 因為我係全班最矮的, 但跳的欄居然要同佢地一樣咁高! 真係唔公平! 如果我矮多一兩吋的話就可以跳個矮d既欄喇. 不過媽媽話如果生得矮d就係失格的小牧喎.
仲有我畢業考試作:
2003年8月9日 我中班畢業喇
學的是clicker training. 同班同學仲有bobo同summer, 同埋一隻好大的labrador. 不過媽媽居然一張相都無同我影過呀!!!!!!!!!!!!!
其實學咗d咩, 宜家真係唔係好記得, 因我媽媽好懶, 一次都無同我練習過!
2003年1月25日 我要絕育了
因為我早起水既關係 (七個月就黎喇!), 阻遲咗媽媽同我訂定的家庭計劃. 當年仲有好多人勸佢唔好同我絕育, 話我呢d顏色少有, 唔生bb好嘥, 不過媽媽梗係唔捨得比我生啦! 爸爸就話要生的話就要所有bb都要晒, 唔準比人架, 嗄, 呀媽話千祈咪搞呀!
於是佢地就約咗太平道麥子健診所的Dr Tint幫我絕育, 順便幫我電埋眼泣毛! 
前一晚呀媽仲驚我帶唔慣燈罩, 叫我要實習下喎. hehe, 我靚唔靚呀. Bingo唔好瞓, 睇下啦!
呀媽話我唔可以咁得戚, 叫我同pooh pooh 拜拜喎. 因有排都唔可以攬住佢瞓.
第二朝一早佢地就帶咗我去診所喇, 仲等咗好耐先見倒Dr Tint, 因為佢地太緊張, 好多野要問! 車, 又唔係第一次, Bingo都試過啦, 都唔知做咩咁大驚少怪!
點知原來我係排到當日最後一個先做手術, 佢地六點幾黎接我時我都未醒, 佢地要享出面等多半多鐘, 姑娘拍醒我先比走呀! 不過我上車又瞓番.
醒番之後好痛呀! 唔怪得呀媽噚晚叫我帶燈罩唔好笑啦, 宜家明點解笑唔出嘞!
2002年12月的某一天 我跳海呀!
呢日老豆老媽子見咁好天, 於是就同兩個朋友, 帶咗我地去淺水灣玩. 好開心呀, 因為係冬天, 所以佢地唔比我地落水玩, 咁我地咪去碼頭果邊玩囉. 我圍住個碼頭果d邊邊行, 行下又出d, 行下又出d, 仲行到石級出面, 走黎走去, 好開心呀! 跟住無端端噗一聲, 就聽倒人叫: 哎吔, 果隻狗跌咗落水呀!
跟住就好多人享上面圍觀, 我估我成世狗最威都係果次, 咁多人企享碼頭上面, 好似睇我表演咁. 爸爸同佢一個朋友就係咁叫, 係咁引我, 引我游去觀音廟果邊, 我係咁游係咁游, 游到水淺d既時候, 爸爸同個朋友就合力扯咗我上水嘞, 上到水先知, 原來bingo唔見咗!
佢個衰公見個個都卦住我, 嬲嬲地自己走咗入觀音廟入面參觀呀! 好彩媽媽發現得快, 走去捉番佢出黎!
呢張相係媽媽唔停咀咁鬧我果時影既!
2007年3月21日 星期三
2002年12月22日 初會哥哥
話說我入咗喜樂蒂會之後, 我個profile就比放咗上網嘞, 一日哥哥的媽媽享網上見倒, 咦, 點解佢同個仔仔同年同月同日生, 又咁岩係雲石色, 唔通佢就係之前寵物店所講比人抱走咗既妹妹? 於是佢媽媽就留咗個訊息享留言版, 一check之下就發現係喇. 我媽媽都認得哥哥個樣啦!
呢日我媽媽就帶咗我去見哥哥嘞, 佢媽媽幫佢改咗個名叫Tanbie. 我地去咗佢上堂既元朗百樂會. 噢! 原來佢仲怕嬲過以前呀, 死都唔比我媽媽抱! 不過佢又肯乖乖咁同我影相喎. 果時我地十個月大喇, 你睇下哥哥幾多毛? 我仲係短切切! 激死! 細個明明一樣架喎.
好野, 姨媽幫我捉倒佢喇, 你睇下佢, 驚到震呀!
呢張相係我地兩個各自番咗屋企後第二日影架, 睇下係咪一樣呀!
都唔知姨媽比咗d咩Tanbie食! 不過媽媽話我因為起咗一次水, 所以甩咗好多毛喎. 女人...真係苦!
果日下午, 我同Bingo再去第二度影相, 媽媽話好記得果時我起完水甩晒d毛毛好肉酸喎.
爸爸話最鍾意我同Bingo呢張相, 所以佢晒咗兩張放享公司同荷包.
2002年9月29日 嘩! 第一次見咁多小牧咋!
呢日我去咗參加當年喜樂蒂牧場的活動, 唔講你唔知, 我仲係佢地第一次雲石色的會員黎架. 我地全家都係第一次見咁多小牧一齊出面, 仲第一次去獅子會添呀, 斷估你地都無我咁早!
開似拉條, 係咪好樣衰呢...
果時bingo已經唔行得, 所以都係咭下坐下咁囉, 不過把死人聲仲係鬼咁大架, hehe, 但佢一吠就企唔穏, 會跌低!
而我...就梗係甩繩馬騮啦, 媽媽好唔明, 點解其他小朋友個個都叫得番, 淨係我好似聾咗咁, 一味喪跑!
呢次係我除咗返學, 第一次同其他狗玩咋. 不我鍾意佢佢地玩多d, 因為享學校成日都比人兜頭兜腦咁踩, 呢度個個都咁高咁大嘛!
訂閱：
意見 (Atom)